92.am

Ֆուտբոլային ռեկորդներ

Աննա-Էքիզյան — Fri, 04 Jul 2014 16:03:14 GMT

Քանի որ աշխարհն ապրում է ֆուտբոլային տրամադրությամբ, մենք էլ փորձեցինք անմասն չմնալ և մեր ձևով անդրադառնալ ֆուտբոլային թեմաներին: Խոսելու ենք ֆուտբոլային ռեկորդների մասին, բայց ոչ ավանդական ամենագեղեցիկ գոլ, ամենաթանկ ֆուտբոլիստ կամ ամենամեծ ստադիոն, այլ....հիմա կտեսնեք:

1. Ամենակարճ ֆուտբոլային հանդիպումը

Հանդիպումը տեղի է ունեցել Բուլղարիայում ՝ Բուլղարիայի ֆուտբոլի առաջնության շրջանակներում: Այն տևել է ընդամենը 4 րոպե, քանի որ, ինչպես հայտնում են աղբյուրները, խաղի սկզբից 4 րոպե անց մրցող թիմերից մեկը դաշտում ուներ ընդամենը 6 խաղացող, իսկ համաձայն տեղի կանոնների, խաղը չի կարող շարունակվել, եթե թիմերը դաշտ են դուրս եկել 7-ից քիչ խաղացողներով: Բանն այն է, որ ի սկզբանե թիմերը խաղը սկսել էին արդեն իսկ քիչ ֆուտբոլիստներով՝ յուրաքանչյուրը 8-ական խաղացողներով, քանի որ հիմնական մասը վնասվածքներ էր ստացել ու մասնակցել ուղղակի չէր կարող: Իսկ արդեն խաղի ընթացքում թիմերից մեկի 2 ֆուտբոլիստներ ևս ստացան վնասվածքներ, և քանի որ նրանց փոխարինելու հնարավորություն այլևս չկար, գլխավոր մրցավարը ստիպված եղավ դադարեցնել հանդիպումը: Ուշագրավն այն է, որ խաղն ավարտվեց 3-0 հաշվով՝ թիմերից մեկի հաղթանակով: Ա՜յ քեզ գոլառատ հանդիպում, այն էլ 4 րոպեում:

2. Ամենաերկար ֆուտբոլային հանդպիումը

Ամենաերկար ֆուտբոլային հանդիպումն էլ, հարգելիներս, տեղի է ունեցել ոչ շատ երկար տարիներ առաջ: Խաղի տևողության համաշխարհային ռեկորդը գրանցվել է Անգլիայում՝ 2013թ-ին: Հանդիպումը տեղի ունեցավ Բրիսթոլ և Լիդս՝ Բրիսթոլյան ակադեմիայի թիմերի միջև: Այն տևեց շուրջ 36 ժամ և ավարտվեց Լիդսի հաղթանակով՝ ուշադրություն, 285-255 հաշվով: Յուրաքանչյուր թիմի կազմում հանդես էին գալիս 18 հիմնական խաղացողներ, որոնցից յուրաքանչյուրը խաղաց 18 ժամ, իսկ մնացած ժամանակը նրանք իրավունք չունեին լքելու ստադիոնը կամ գնալու հանդերձարան: Հանդիպումը կազմակերպվել էր բարեգործական՝ մինինգիտի դեմ պայքարի համար հանգանակություն հավաքելու նպատակով: Խաղի ընթացքում հավաքվեց մինչև 10 հազար ֆունտ ստեռլինգ: Բրիսթոլն ու Լիդսը գերազանցեցին նախորդ՝ կանադացիների կողմից սահմանած 33.5 ժամ տևողությամբ ռեկորդը:

3. Ամենակոպիտ ֆուտբոլային հանդիպումը

Արի ու տես, որ կարող է այնպիսի հանդիպում էլ լինել, որի ժամանակ կարմիր-դեղին քարտերի իսկական տարափ լինի: Հանդիպումը տեղի է ունեցել 1969թ նոյեմբերի 3-ին,կրկին Անգլիայում՝ Սուրրեի և Հաուլիի միջև: Նրանք իսկական չեմպիոններ դարձան խաղի ընթացքում, բայց ոչ թե հաղթանակելու, այլ ամենակոպիտ խաղ ցուցադրելու համար: Խաղի ընթացքում թիմերը ստացան 22 կարմիր քարտ: Հասկանու՞մ եք, թե դա ինչ է նշանակում. յուրաքանրյուր ֆուտբոլիստ խաղից հեռացվել է կարմիր քարտով խախտում կատարելու համար: Իսկ ամենահետաքրքիրն էլ այն է, որ խաղացողների հետ հաշիվները մաքրելուց հետո, գլխավոր մրցավարը պատժեց նաև եզրային մրցավարներից մեկին, որ փորձում էր խառնվել ֆուտբոլիստների վիճաբանությանը: Այսպիսով, դաշտը մնաց դատարկ, իսկ խաղն ավարտվեց:

4. Ամենախոշոր հաշվով ֆուտբոլային հանդիպումը:

Եվս մեկ հետաքրքիր փաստ ֆուտբոլի մասին: 2002թ-ին Մադագասկարի Թուամանիս քաղաքում ֆուտբոլային մրցաշար էր տեղի ունենում: Երկրի 4 ամենաուժեղ թիմերը ճանապարհ ընկան չափելու իրենց ուժերը չեմպիոնի կոչման համար: Այնպես ստացվեց, որ խաղի ավարտի հենց վերջին րոպեին մրցավարը 11 մետրանոց նշանակեց հյուրընկալող թիմի՝ Օլիմպիկ լը Էմիրնի դարպասին, ինչի հետևանքով նրանք զրկվեցին պայքարը շարունակելու հնարավորությունից: Մրցաշարի վերջին հանդիպմանը, ձախողված Օլիմպիկը պիտի ուժերը չափեր արդեն չեմպիոն դարձած Ադեմայի հետ: Խաղի մեկնարկից հետո ֆուտբոլիստները, հետևելով մրցավարի հրահանգներին և ցանկանալով արտահայտել իրենց բողոքը անարդար մրցավարության դեմ, սկսեցին ամեն 36 վայրկյանը մեկ ինքնագոլ գրանցել: Ադեման մյուս կիսադաշտից լուռ հետևում էր վերջիններիս տարօրինակութանը: Արդյունքում խաղն ավարտվեց 149-0 հաշվով: Սա համարվում է ամենախոշորը ֆուտբոլի պատմության մեջ: Բայց եթե համարենք, որ սա չի գրանցվել ուժային պայքարում, ապա խոշոր հաշվով խաղ կարող ենք համարել 1885թ-ին Շոտլանդիայի գավաթի մրցաշարի ընթացքում տեղի ունեցած հանդիպումներից մեկում գրանցված հաշիվը, որի ժամանակ հանդես էին գալիս Արբոաթն ու Բոն Ակկորը: Խաղն ավարտվեց 36-0 հաշվով՝ Արբոաթի մաքուր հաղթանակով:

Շնորհավոր հունիսի մեկ, մեր բալիկներ

Աննա-Էքիզյան — Sun, 01 Jun 2014 08:54:00 GMT

Այսօր աշխարհի բոլոր մանուկները տոնում են իրենց օրը` հունիսի մեկը` երեխաների պաշտպանության միջազգային օրը:
Ցանկանում եմ, որ աշխարհի բոլոր երեխաները երբեք չլսեն անգամ պատերազմ բառը, երբեք չտեսնեն դաժանություններ ու երբեք չկորցնեն իրենց հոգու պարզությունը: Ուզում եմ , որ բոլորը, ինչպես նախկինում , խաղան խաղալիքներով, բայց երբեք ու երբեք չդառնան խաղալիք ուրիշների ձեռքում և միշտ կարողանան տարբերակել տիկնիկը մարդուց, ուզում եմ, որ խաղան բակում , խաղան ֆուտբոլ, բռնոցի, պահմտոցի, այլ ոչ Քենդի Քրաշ, Քաունթեր Սթրայք կամ Էնգրի Բիրթս: Եթե կռվել, ապա կռվել իրական միջավայրում` մի կոնֆետի կամ մուլտհերոսի պիտակի համար, այլ ոչ վիրտուալ աշխարհում, այն էլ ` զենքերով: Եթե լաց լինել, ապա միայն անփութորեն ընկնելուց, այլ ոչ հարվածներից: Եվ եթե սովորել, ապա միայն լավը: Իսկ ինչ վերաբերում է ներկայիս տեխնոլոգիաներին, որ նախկինում չկային, ապա փորձեք չդառնալ դրանց զոհը, որովհետև հեռախոսով խաղալուց, նամակներ գրելուց, համակարգչի առաջ ժամերով նստելուց ու կուրանալուց զատ այնքան հետաքրքիր բաներ կան աշխարհում, որոնցով պիտի հետաքրքվեք ու շտապեք բացահայտել դրանք ձեզ համար: Վայելեք աստվածային մանկությունը, մեծանալ միշտ էլ կհասցնեք:
Եվ քանի որ բոլորս մեր ծնողների համար միշտ երեխաներ ենք մնում, բոլորս էլ հոգու խորքում քիչ, թե շատ մնացել ենք մանուկներ, ով ասաց որ այսօր մեր օրն էլ չէ: Բոլորս էլ ծննդով մանկությունից ենք...

Տգեղ ձեռագրերով մարդիկ

Աննա-Էքիզյան — Sun, 02 Mar 2014 08:14:08 GMT

1. Ձախակողմյան գրելաձևը, որ « հայելային» են կոչում, հոգեբանության մեջ ստացել է «Լեոնարդոյի ձեռագիր» անվանումը: Լեոնարդո դա Վինչին հենց այդպես էր գրում իր բոլոր գրությունները, որն ավելի է բարդացնում դրանց վերծանումը:

2. Նապոլեոն Բոնապարտը իր ողջ կյանքի ընթացքում փոխել է իր ձեռագիրը, որը տարեցտարի դառնում էր ավելի ու ավելի անընթեռնելի ու խրթին:

3. Պուշկինի ձեռագիրը կարելի է անվանել «արագագիր» ինչ-որ տեղ, որով երբևէ չեն հիացել ոչ նրա ծնողները, ոչ էլ ուսուցիչները. Այդպիսի ձեռագիր ունենալը մի փոքր անհամարմար էր այն ժամանակ:

4. Իր ձեռագրի գեղեցկությամբ աչքի չի ընկել նաև Նիկոլայ Գումիլևը:

5. Լերմոնտովը նույնպես հաճախ էր փոխում ձեռագիրը, և անգամ երբ ջանում էր գեղեցիկ ու հավասար գրել, նրա տողերը միշտ վերև էին ստացվում , իսկ տառերը կամ ներքևում էին կամ էլ վերևում: Նրա ձեռագիրը դիտվել է որպես տիպիկ նյարդային անհատի ձեռագիր:

6. Բեթհովենի 9-րս սիմֆոնիան տպագրվել է գրվելուց 2 տարի անց միայն: Խնդիրն այն էր, որ Բեթհովենի սիրելի օգնականը, որն արտագրում էր նրա ձեռագրերը, մահացավ, ու նրա երկու այլ օգնականներն ուղղակի չէին կարողանում վերծանել հանճարի խայտառակ ձեռագիրը:

7. Չերչիլի «Էպիստոլյան ձեռագրերը» պարզապես անընթեռնելի են նրանց համար, ովքեր սովոր չեն նրա ձեռագրին ու ծանոթ չեն դրան. Նա շատ մանր է գրել, խիտ ու անհասկանալի: Երբ մի անգամ Չերչիլին ասացին, որ նրա ձեռագիր Կլեոպատրայի ձեռագիրն է հիշեցնում, ուղղակի ապշահար եղավ:

8. Էնշտեյնը ոչ միայն անհասկանալի էր գրում, այլև ծայրաստիճան փնթի: Նրա շատ ձեռագրերի վրա թանաքների ու տարբեր այլ տեսակի հետքեր կան, անգամ մատնահետքեր` կեղտոտված թանաքամանի մեջ:

9. Լև Տոլստոյի ձեռագիրը դժվարընթեռնելի էր տարբեր տեսակի նշանների , հավելումների ու կրճատումների պատճառով: Նրա ձեռագիրը կարողանում էր հասկանալ միայն կինը, որն էլ մի քանի անգամ ստիպված է եղել արտագրել «Պատերազմ և խաղաղություն» վեպը:

Ընդդիմացող մարդը

Աննա-Էքիզյան — Thu, 09 Jan 2014 09:44:21 GMT

Ձեր ուշադրությանն եմ ցանկանում ներկայացնել մինչև 2013 թվականը տեղի ունեցած մի շարք ապսամբությունների, ցույցերի ու քաղաքացիական բախումների մի քանի լուսանկարներ: Դրանք ցույց են տալիս մարդու ՄԱՐԴԿԱՅԻՆ վերաբերմունքն իր նմանի հանդեպ:

Լուսանկարներին նայելով ակամայից մտածում ես, որ բոլորս էլ նույնն ենք՝

անկախ ազգային, տարիքային, սեռային ու կրոնական պատկանելությունից: Նայում ու հասկանում ենք, որ բացի միմյանց վնասելուց, ցավ պատճառելուց, վախի մթնոլորտ ստեղծելուց մենք կարող ենք ուղղակի աջակցել միմյանց, օգնել, սատարել, ինչպես երեխան քաղաքացիական ծառայողին, ինչպես կինը ոստիկանության աշխատակցին: Նայում ենք ու մտածում, թե ինչպես կարող են միևնույն երկրում ապրող մարդիկ դուրս գալ միմյանց դեմ, ինչպես կարող են քաշքշել ու վիրավորել իրար, և դա միայն ամենամեղմ դեպքերում: Եվ ևս մեկ անգամ համոզվում ենք, որ աշխարհիս երեսին ամենավտանգավոր արարածը դեռևս շարունակում է մնալ հենց ինքը մարդը: Կենդանական աշխարհում և ոչ մի կենդանի չի ուտում իր նմանին. երբևէ տեսե՞լ եք, որ առյուծը ցանկանա ուտել մեկ այլ առյուծի: Իսկ մարդն ամեն քայլափոխի ոչնչացնում է իր նմանին: Եվ հենց մարդն էլ կտանի աշխարհը կործանման , եթե մի պահ կանգ չառնի ու չգիտակցի, որ արդեն բավ է:

Եկեք փոխվենք, ու լինենք այս մարդկանց նման, որոնք վախենալու արտաքինով ոստիկանին ուղղակի կարող են փուչիկ նվիրել, կարող են միմյանց ծաղկեփունջ տալ փշալարերի միջով և կամ սեր խոստովանել կրակների մեջ: Լինենք բարի:

Շնորհավոր Ամանոր և Սուրբ ծնունդ

Աննա-Էքիզյան — Tue, 31 Dec 2013 08:56:40 GMT

92-ը շնորհավորում է իր բոլոր աշակերտների ու ուսուցչական ողջ անձնակազմի Ամանորն ու Սուրբ ծնունդը, մաղթում է նորանոր բարձունքներ ու ձեռքբերումներ, նոր հաղթանակներ, հրաշալի միջոցառումներ ու ուրախ ընտանեկան միջավայր բոլորի համար, չէ՞ որ դպրոցը մեր երկրորդ տունն է: Բարի գալուստ, 2014 թվական, մենք սպասում ենք քեզ:

ֆրանսիական տոն 92-ում (Vahan Teqeyan 92)

Աննա-Էքիզյան — Fri, 13 Dec 2013 18:33:46 GMT

Այսօր Երևանի թիվ 92 հիմնական դպրոցի դահլիճում իսկական ֆրանսիական տրամադրություններ էին. 4 ՛բ՛ դասարանի փոքրիկներն իրենց ուսուցչուհու՝ տիկին Լարիսա Նազարյանի գլխավորությամբ ուրախ տոն էին կազմակերպել: Երեխաները ուսումնական մեկ տարվա ընթացքում արդեն սովորել են ֆրանսերենի այբուբենն ու յուրացրել են տարրական գիտելիքներ լեզվի մասին, ինչի արդյունքն էլ եղավ նրանց հիանալի միջոցառումը: Միջոցառման ժամանակ դահլիճը լեփ-լեցուն էր: Հնչեցին տառերին նվիրված ոտանավորներ, Ֆրանսիացի գրողների բանաստեղծություններ, երգեր, ինչպես նաև բեմադրվեց Շաղգամը հեքիաթը՝ ֆրանսերեն տարբերակով: Բոլոր աշակերտները պատվով կատարեցին իրենց ուսուցչուհու առաջադրանքը, ինչն էլ վկայում էին հանդիսատեսի ծափահարությունները:

Միջոցառման նկարները կարող եք տեսնել ինչպես մեր կայքի ալբոմում, այնպես էլ մեր ֆեյսբուքյան էջում:

Սիրով՝ 92

«Անհաջողակ» հաջողակները

Աննա-Էքիզյան — Fri, 15 Nov 2013 16:11:33 GMT

1. Բեթհովենի ուսուցիչը նրան միանգամայն անտաղանդ էր համարում: Ասում էր՝ բանի պետք չէ: Բայց արի ու տես, որ Բեթհովենը ոչ թե բանի պետք չէր, այլ ամբողջ աշխարհին էր պետք:

2. Բժշկությունը թողած Դարվինի մասին հայրն ասում էր. <<Քեզ ոչինչ չի հետաքրքրում բացի շներ ու առնետներ որսալուց>>:

3. Վոլթ Դիսնեյը թերթի խմբագրությունից հեռացվել էր՝ բավարար գումար չունենալու պատճառով:

4. Մինչև չորս տարեկանը Էնշտեյնը չէր խոսում: Ուսուցիչը նրան նկարագրում էր, որպես մտավոր հետամնացի:

5. Հայտնի քանդակագործ Ռոդենի հայրն ասում էր.<<Տղաս հիմար է: Նա երեք անգամ արդեն չի կարողացել ընդունվել արվեստների համալսարան>>:

6. Դպրոցում Մենդելեևը քիմիայից երեքներ էր ստանում:

7. <<Ֆորդ>> ֆիրմայի մեքենաներին նայելիս մենք մտածում ենք, թե դրանց հեղինակ Հենրի Ֆորդը միշտ հարուստ ու հաջողակ գործարար է եղել: Բայց արի ու տես , որ նրա կյանքում ամեն ինչ այդքան հեշտ ու հարթ չի եղել. քչերը գիտեն, որ նա մի քանի անգամ իրեն սնանկ է հայտարարել, նա, որ փոխեց աշխարհը՝ այն դնելով անիվների վրա:

8. Երբ Մարկոնին՝ ռադիոյի ստեղծողը, հայտարարեց իր ընկերներին, որ շուտով բառերը օդային տարածության մեջ մի տեղից մյուսն է փոխանցելու: Նրան խելագար համարեցին ու հոգեբանի մոտ տարան: Մի քանի ամիս անց նրա ռադիոն սկսեց արդեն բազմաթիվ նավաստիների կյանքեր փրկել:

Հիշեք այս մարդկանց անունները, որոնք բոլորիս էլ հայտնի են: Հիշեք նրանց մասին հատկապես այն ժամանակ, երբ մտածում եք, թե ձեզ մոտ երբեք ոչինչ չի ստացվի ու դուք ոչինչ չեք կարողանում անել: Գուցե սա հենց հանճար դառնալու ձեր պահն է :)

Հանճարեղ երազներ

Աննա-Էքիզյան — Thu, 14 Nov 2013 18:07:08 GMT

Բոլորս քնում ու երազներ ենք տեսնում, հաճախ չենք քնում մեզ տանջող մտքերից, երբեմն էլ քնում ենք շատ քիչ կամ ընդհանրապես չենք քնում: Իսկ հանճարները քնում ու հայտնագործում են անգամ քնի մեջ: Ներկայացնում եմ Ձեզ գլուխգործոցներ ու հայտնագործություններ, որոնք իրենց ծնունդն առել են հեղինակների «քնած» ուղեղներում:

Մենդելեևիի քիմիական տարրերի աղյուսակը:

Ասում են՝ Դմիտրի Մենդելեևը մինչ աղյուսակը հայտնագործելը 3 օր շարունակ առանց հանգստի աշխատել է: Որոշել է մի փոքր հանգստանալ ու աչքերը փակել է: Եվ մի 17 ժամ հանգիստ քնելու փոխարեն, որ սովորական մարդկանց հետ պատահում է մի քանի օրվա անդադար աշխատանքից հետո, Մենդելեևն իր երազում տեսնում է քիմիական տարրերի դասավորության աղյուսակը, որը պիտի փոխեր ողջ քիմիական աշխարհը: 20 րոպե անց նա վեր է թռչում իր տեղից ու արագ-արագ սկսում կազմել աղյուսակը: «Ես երազումս տեսա այդ աղյուսակը, ուր բոլոր տարրերը հատ առ հատ տեղավորված էին իրենց տեղերում: Ես վեր կացա ու սկսեցի միանգամից գրել դրանք: Միայն մի տարր անհրաժեշտ եղավ ուղղել»,-ասում է մեծն գիտնականը:

Բիթլսի «Yesterday» հիթային երգը:

Պոլ Մկքարթնին 22 տարեկան էր , երբ մի օր քնից արթնացավ մի հրաշալի մեղեդի գլխում ու մտածեց, թե այդ ինչ էր: Նա վեր կացավ անկողնուց ու սկսեց դաշնամուրի վրա նվագել այդ մեղեդին: Նրան թվում էր, թե մի քանի տարի առաջ լսել էր այդ երաժշտությունն ու պատահմամբ հիշել է: Հետագայում, իհարկե, ինքն էլ հասկացել է, որ իրական հեղինակը հենց ինքն է:

«Ֆրանկեշտեյնի հրեշը»

Հեղիակ Մերի Շեյլլին ու նրա մյուս մտավորական ընկերները որոշում են գրական մրցույթ կազմակերպել: Մերին չէր կարողանում ոչինչ գրել, մինչև չգնաց քնելու: Երազում նա տգեղ տղամարդու դիակ տեսավ, որ կյանքի նշաններ ցույց տվեց այն ժամանակ, երբ մի ինչ-որ ահռելի սարք գործադրեցին նրա վրա: Մերին արթնացավ, ու մտածեց, որ եթե այդ տեսիլքը վախեցրել է իրեն, ապա կվախեցնի և մյուսներին: Մնում էր միայն ճիշտ նկարագրել հրեշին, որին նա տեսել էր իր կեսգիշերային մղձավանջներում:

«Ջեկիլն ու Հայդը»

Նմանատիպ դեպք պատահեց նաև Լուիս Սթիվենսոնի հետ Ջեկիլլն ու Հայդը գրելուց առաջ: Նա գիտեր, որ ուզում էր գրել մարդու երկբնության մասին, բայց ոչ մի միտք նրա գլխում չէր ծնվում: Նա փակեց աչքերը...«Երկրորդ գիշերը ես երազ տեսա. տեսարանը պատուհանի մոտ էր, որ հետո երկու մասի բաժանվեց, որոնցից մեկում Հայդն էր, որ փորձում էր թաքնվել մի ինչ-որ հանցանքից հետո: Նա մի փոշի գտավ ու միանգամից իրեն հետևողների առաջ փոխվեց»:

Խոսենք «Սումերկի»-ի մասին:

Անկախ նրանից՝ դուք սիրում եք այս պատմությունը, թէ ոչ, պետք է համաձայնեք , որ Ստեֆանի Մեյերին հաջողվել է հետաքրքիր ու տպավորիչ պատմություն կերտել իր ընթերցողների համար: Հեղինակը պարտական է իր երազներից մեկին, «Ես երկու մարդու տեսա: Նրանցից մեկը գեղեցիկ էր, պայծառ, իսկ մյուսը՝ հասարակ մի աղջիկ, ու նրանք զրուցում էին: Երիտասարդը վամպիր էր, ինչը բավականին տարօրինակ էր, ու նա փորձում էր բացատրել աղջկան, թե որքան է մտածում նրա մասին ու որքան է ուզում սպանել նրան: Ես պարզապես շատ էի ցանկանում հիշել երազս ու գրեցի այն»,-ասում է Մեյերը:

«Մեռյալների գիրքը»

Հովարդ Լաֆկրաֆտը իր հայտնի գիրքը գրել է այն երազում տեսնելուց հետո: Նա մինչ այդ ոչ մի միտք չուներ: Վերնագիրը նա ևս երազում է տեսել, ինչի նշանակությունը պարզապես չէր հասկանում: Ապա հունարենից թարգմանել է որպես Մեռյալների օրենքների կերպ, ձև: Երևի հենց դա էլ նրան ոգեշնչել է ու նա ստեղծագործությունն անվանել է «Աստրոնոմիկոն»:

«Տերմինատոր»

Նա նման է անզգա կիբեր-մարթասպանի Առնոլդ Շվարցնեյգերի կերպարանքով: Նա Ջեյմս Քեմերոնի գիշերային մղձավանջն էր: Ի դեպ, «Ավատարը» ևս նա երազում է տեսել:

Կարի մեքենայի ասեղը

Էլիաս Հոուն ժամանակակից կարի մեքենայի հեղինակն է: Մինչ այն ստեղծելը նա բախվեց ասեղի՝ ինքնուրույն աշխատելու խնդրին: Ինչպես գրում է թերթերից մեկը, նա քնի մեջ է տեսել ասեղի աշխատանքը: Նա տեսել է, թե ինչպես է մի տարօրինակ երկրում կարի մեքենա պատրաստում մի դաժան արքայի համար: Արքան նրան 24 ժամ է տալիս գործը գլուխ բերելու համար: Նրան չի հաջողվում կատարել արքայի հրամանը, ու նրան առավոտյան տանում են պահապատժի: Հենց այդ ժամանակ նրա աչքերին են զարնում նրան ուղեկցող զինվորների նիզակները, որոնց ծայրերին սուր երկաթներ էին: Հենց այդ ժամանակ նրա միտքը փայլատակեց, ու նա սկսեց աղաչել , որ իրեն լրացուցիչ ժամանակ տան: Հենց այդ պահին էլ նա արթնանում է: Ժամը առավոտյան 4-ն էր: Նա արագ հագնվեց, գնաց արհեստանոց ու սկսեց աշխատել: Ժամը 9-ին ասեղը պատրաստ էր:

ԴՆԹ

1953թ. բժիշկ Ջեյմս Ուոթսոնը երազ տեսավ: Նա տեսավ երազում երկու օձերի՝գլուխները հակառակ ուղղություններով , որ հետագայում արդեն նմանվում է ԴՆԹ-ի ձևին:

Գրական ամենակարճ գլուխգործոցները

Աննա-Էքիզյան — Fri, 11 Oct 2013 11:56:13 GMT

Տարբեր ժամանակներում և տարբեր հանգամանքներում որոշ գրողների հաջողվել է ընդամենը մի քանի բառով գրական գլուխգործոցներ ստեղծել, որով նրանք կրկին անգամ ապացուցում են հանճար լինելու փաստը:

Մի անգամ Հեմինգուեյը գրազ եկավ, որ կգրի ստեղծագործություն`կազմված ընդամենը 6 բառից, որը կհուզի ցանկացած ընթերցողի: Ստեղծագործության բովանդակությունը հետևյալն էր. «Վաճառվում են մանկական կոշիկներ`երբեք չհագած» :
Ֆրեդերիկ Բրաունի գրչին է պատկանում ամենակարճ, սարսափ ժանրի պատմությունը. «Վերջին մարդը Երկրի երեսին նստած էր սենյակում: Հանկարծ դուռը ծեծեցին...»
Օ. Հենրին հաղթել է ամենակարճ պատմությունների մրցույթում մի պատմությամբ, որն ունի սովորական պատմությանը բնորոշ բոլոր հատկանիշները`զարգացում, հանգույց, կուլիմինացիա. «Վարորդը ծխելով կռացավ, որ տեսնի, թե որքան բենզին է դեռ մնացել: Մահացածն ընդամենը 23 տարեկան էր» :
Անգլիացիները ևս որոշեցին ամենակարճ գրական ստեղծագործության մրցույթ հայտարարել: Ստեղծագործության մեջ պետք է հիշատակվեին (կամ դեպի դրանք հանգեին) թագուհի, Աստված, սեռական հարաբերություն, գաղտնիք բառերը: Հաղթեց հետևյալ ստեղծագործությունը. «Տեր Աստված,-ճչաց թագուհին,-ես հղի եմ ու չգիտեմ, թե ումից» :
Ամենակարճ ինքնակենսագրություն մրցույթում հաղթեց մի ֆրանսուհի, որը գրել էր հետևյալ պատմությունն իր մասին. «Նախկինում ես հարթ դեմք ու ծալքավոր կիսաշրջազգեստ ունեի, իսկ հիմա`հակառակը» :
1895թ. Վալերի Բրյուսովը գրեց իր ամենակարճ բանաստեղծությունը. «Օ~ , ծածկիր քո գունատ ոտքերը... »:

Իսկ այժմ ևս մի քանի ստեղծագործություններ, որոնք նախորդներից երկար են, բայց կրկին դասվում են ամենակարճերի շարքում.

Ջեյն Օրվիս- «Պատուհան»

Ռիտայի դաժան սպանությունից հետո Քարթերն անընդմեջ նստած էր պատուհանի առաջ: Ոչ մի հեռուստացույց, ընթերցանություն, նամակագրություն: Նրա կյանքը վարագույրներից այն կողմ էր: Նա թքած ուներ, թե ով է իրեն ուտելիք բերում, ով է հարկերը վճարում. սենյակից երբեք դուրս չէր գալիս: Նրա կյանքը դրսում վազող մարզիկներն էին, տարվա եղանակների փոփոխությունը, անցնող-դարձող մեքենաները, Ռիտայի ուրվականը: Քարթերը չէր հասկանում, որ պալատի` թաղիքով ուռացրած պատերը պատուհաններ չունեին:

Ալան Մայեր- «Անհաջողություն»

Ես արթնացա ողջ մարմինս տանջող անտանելի ցավից: Երբ բացեցի աչքերս, տեսա բուժքրոջը, որ կանգնած էր մահճակալիս կողքին.

-Պարոն Ֆուջիմա,-ասաց նա,- Ձեր բախխտը բերել է. Դուք կարողացաք ողջ մնալ Հերոսիմայի դեպքերից հետո: Բայց հիմա Ձեզ ոչ մի վտանգ այլևս չի սպառնում:

Քիչ կենդանացած թուլությունից`հարցրի.

-Որտե՞ղ եմ:

-Նագասակիում,-պատասխանեց բուժքույրը:

Լարիսա Կերքլենդ- «Առաջարկություն»

Աստղազարդ երեկո: Ամենահարմար պահն էր. ընթրիք մոմի լույսի ներքո. իտալական հարմարավետ ռեստորան. փոքրիկ սև զեստ. շքեղ մազեր, փայլփլուն աչքեր, արծաթյա ժպիտ: Միասին արդեն շուրջ երկու տարի. հրաշք ժամանակ, իրական սեր, իսկական ընկերներ: Շամպայն , խնդրեմ: Ձեռքս ու սիրտս եմ առաջարկում ծնկի եկած: Մարդի՞կ են նայում: Էհ, թող նայեն: Հիանալի ադամանդե մատանի, շիկնած այտեր, ժպիտ.

-Ինպե՞ս թե ՈՉ:

Ռոբերտ Թոմկինս- «Ճշմարտության որոնումներով»

Վերջապես այդ խուլ, կորած գյուղում նրա որոնումներն ավարտվեցին: Խրճիթում` կրակի առաջ, նստած էր Ճշմարտությունը:Նա երբեք այդքան ծեր ու տգեղ պառավ չէր տեսել.

-Դուք Ճշմարտությու՞նն եք:

Ծեր, կնճռոտ պառավը շրջեց գլուխը:

-Ասացեք ինձ, ի՞նչ պիտի ես հաղորդեմ ողջ աշխարհին, ի՞նչ լուրեր պիտի տանեմ ինձ հետ:

Պառավը, թքելով կրակի մեջ, ասաց.

-Ասա, որ ես երիտասարդ ու գեղեցիկ եմ:

Ինչ անել գովազդային ընդմիջման ժամանակ

Աննա-Էքիզյան — Wed, 09 Oct 2013 16:28:56 GMT

Գովազդային ընդմիջման ժամանակ բացի պարապ նստելուց ու հոլովակների տևողության րոպեները հաշվելուց կարելի է շատ ավելի օգտակար գործեր անել: Եկեք փոքրիկ ցուցակ կազմենք: Եվ այսպես, ինչ կարելի է անել, երբ մեր սիրելի հաղորդումը, ֆիլմը կամ ծրագիրն ընդմիջվում են գովազդային հոլովակներով: Մենք գիտենք , որ ցանկացած գովազդային ընդմիջում այսօր կարող է տևել մինչև 5 րոպե: Համաձայնեք, որ 5 րոպեն քիչ չէ մի որևէ օգտակար բան անելու համար.

Կարելի փոքրիկ`5 րոպեանոց թարմացնող ֆիզիկական վարժություններ կատարել: Ով է ասել, որ հեռուստացույց դիտելիս անպայման պետք է պառկած լինել բազմոցին:
Իսկական ժամանակն է աղբը թափելու: Երեկոյան կողմ, երբ արդեն ողջ օրվա աղբը հավաքվել է , կարելի է մի քանի րոպեում այն թափել և դրանով դուք կխնայեք առավոտյան ժամանակից:
3-ից 5 րոպեում կարելի է հավաքել ողջ սենյակը, որտեղ գտնվում եք:
Գնացեք խոհանոց ու մի բաժակ ջուր խմեք: Հասարակ խմելու ջուրը շատ օգտակար է օրգանիզմի համար:
Սենյակի փոշիները մաքրեք: Հենց հեռուստացույցից էլ կարող եք սկսել:
Եթե առավոտյան որևէ տեղ ունեք գնալու, կամ աշխատանքի եք կամ էլ դպրոց պիտի գնաք, պատրաստեք գովազդային ընդմիջման ժամանակ փոքրիկ սենդվիչներ, տեղավորեք դրանք սառնարանում և առավոտյան այլևս կարիք չի լինի դրա վրա ժամանակ վատնելու:
Այս մի կետը հատկապես դուր կգա աղջիկներին: Գովազդային ընդմիջման ժամանակ կարող եք վաղվա համար հագուստ ընտրել, դասավորել և առավոտյան դրա պատճառով չեք ուշանա:
Եթե հեռուստացույց դիտում եք ուշ ժամի, այդ ընթացքում կարող եք մահճակալը բացել, պատրաստել քնելու համար:
Գովազդային հոլովակի դադարը կարող եք օգտագործել որովայնը մի որևէ օգտակար բանով լցնելու համար, ենթադրենք, որևէ միրգ կարելի է ուտել, կամ հյութ խմել:
Այս ցանկում առավել մեծ տեղ է գրավում ինձ համար հատկապես հենց այս կետը, որով էլ ցանկանում եմ եզրափակել նյութը: Վերցրեք հեռակառավարման վահանակը, սեղմեք Mute կոճակն ու պարզապես նստեք լռության մեջ ու վայելեք այն: Կյանքում շատ քիչ պահեր են լինում, երբ կարելի է ուղղակի վայելել լռությունը, որը երբեմն մեզ այնքան անհրաժեշտ է: Պետք չէ բաց թողնել այդ պահերը: